Matigsalug Manobo Bible

Hinisis

Ka Bunsuranan

Igpewun-a

Ka kaluwasan te lalag ne Hinisis, “bunsuranan”. Seini ne baseen, kayi nasulat ka peggimu te langit wey te tane, ka migpuunan te etew, wey ka bunsuranan te sale wey peg-antus kayi te kalibutan. Nasulat man-e kayi ka guhuren meyitenged te keet-etawan ne in-alam te Manama[gl] wey ka peg-uyan din kandan diye te inged ne insaad din kandan.

Nabaad te daruwa seini se baseen:

1) Ka peggimu te kalibutan wey ka guhuren meyitenged te me etew. Kayi egkabasa ka guhuren meyitenged ki Adan wey ki Iba, ka meyitenged ki Kain wey ki Abil[gl], wey ka meyitenged ki Nuwi[gl] wey ka pegsipuk te weyig, wey ka meyitenged te matikang ne baley diye te Babil.

2) Ka guhuren meyitenged te an-anayan ne me kabuybuyahan te matig-Israil. Si Abraham[gl] ka an-anayan ne kabuybuyahan te matig-Israil ne neyimu ne mabantug tenged te pegpalintutuu wey pegsalig din wey te pegtuman din te suhu te Manama.[gl] Egpakasinundul degma ka guhuren meyitenged te anak din ne si Isaak[gl], wey ka apu din ne si Hakub[gl] (ne egngaranan ded degma ki Israil),[gl] wey ka sapulu wey daruwa (12) ne anak ni Hakub[gl] ne iyan migpuunan te sapulu wey daruwa (12) ne tribu te Israil.[gl] Nahuhud degma kayi ka meyitenged te anak ni Hakub[gl] ne si Husi wey ka neyitabu kandin ne iyan impuunan te nekeendiye te Ihiptu[gl] si Hakub[gl] duma te me anak din.

Egkabasa ta man-e kayi ka guhuren meyitenged te nalein-lein ne me etew ne nabuhal-buhal kayi te ampew te tane wey migmannenasud e. Labew te langun, nahuhud kayi ka dakel ne himu te Manama[gl] ne peggimu te langit wey tane wey te langun ne nakatahu kayi.

Diye te katamanan te guhuren, egkahuhud ka ware egtamanan ne saad te Manama[gl] te keet-etawan din. Kene eglingawan te Manama[gl] ka saad din wey kene din iya egbalaharen ka keet-etawan din su egpanuluen din sikandan wey egbulihan. Ne sikandin ka eggukum wey eglegpad te langun ne eggimu te mareet.

Ka nenasulat te seini ne baseen

Ka peggimu te Manama[gl] te langit wey te kalibutan \ior 1:1–2:25\ior*

Ka bunsuranan te sale wey te peg-antus \ior 3:1‑24\ior*

Ka guhuren ki Adan peendiye te ki Nuwi[gl] \ior 4:1–5:32\ior*

Si Nuwi[gl] wey ka pegsipuk te weyig \ior 6:1–10:32\ior*

Ka matikang ne baley diye te Babil \ior 11:1‑9\ior*

Ka guhuren ki Sim peendiye te ki Abraham[gl] \ior 11:10‑32\ior*

Ka me kabuybuyahan te me Hibruwanen: si Abraham[gl], si Isaak[gl], si Hakub[gl] \ior 12:1–35:29\ior*

Ka me kabuhalan ni Isaw \ior 36:1‑43\ior*

Si Husi wey ka me suled din \ior 37:1–45:28\ior*

Ka me Hibruwanen diye te Ihiptu[gl] \ior 46:1–50:26\ior*

Ka peggimu te kalibutan

1Te an-anayan, innimu te Manama[gl] ka langit wey ka kalibutan. Ne ware pad naay-ayari ka kalibutan dengan, wey ware pad tahu. Nabunbunan te dahat ka tane wey marusilem amana. Ne migweil-weil ka Panisingan te Manama[gl] diye te ampew te weyig. [xr]Ne migkahi ka Manama,[gl]Egkeyimu ka malayag.” Te sikan de, neyimu e ka malayag. Ne natelesan ka Manama[gl] te malayag ne nakita rin. Ne impegsuwey rin ka malayag wey ka delem. Migngaranan din ka malayag teMaaldewwey ka delem migngaranan din teMarusilem.” Ne nasagkup e wey napawe, ne seeye ka an-anayan ne aldew.

[xr]Ne migkahi ka Manama,[gl]Egkeyimu ka eletanan te weyig eyew egkabaad te daruwa ka weyig, diye te ampew ka sabeka ne baad wey diye te diralem ka sabeka.” Te sikan de, neyimu e ka eletanan, wey nabaad e te daruwa ka weyig, diye te ampew ka sabeka ne baad wey diye te diralem ka sabeka. Migngaranan din ka eletanan teAw-awangan”. Ne nasagkup e wey napawe, ne seeye ka igkarangeb ne aldew.

Ne migkahi ka Manama,[gl]Egkalibulung de te sabeka ne inged ka weyig ne diye te diralem te aw-awangan su eyew egpakalepew ka tane ne mammara.” Te sikan de, neyimu e. 10 Migngaranan din ka mammara teTanewey ka weyig ne nalibulung, migngaranan din teDahat.” Ne natelesan ka Manama[gl] te nakita rin. 11 Nataman, migkahi e man-e ka Manama,[gl]Egtubu diye te tane ka nakalkalasi ne me pinamula, seeye se due me beni wey seeye se me kayu ne egbebehas.” Te sikan de, neyimu e. 12 Ne nanubu te tane ka langun ne nakalkalasi ne pinamula. Ne natelesan ka Manama[gl] te nakita rin. 13 Ne nasagkup e wey napawe, ne seeye ka igkatelu ne aldew.

14 Ne migkahi ka Manama,[gl]Egkeyimu ka me malayag diye te langit ne iyan egpegsuwey te maaldew wey marusilem wey eyew egpeila te pegbunsud te me aldew, te me timpu, wey te me leg-un. 15 Eglayag sikandan diye te langit eyew egteng-ew te kalibutan.” Te sikan de, neyimu e. 16 Sikan naa, innimu te Manama[gl] ka daruwa ne mallayag; ka aldew wey ka bulan. Ka aldew ne malmalayag, iyan eglayag te maaldew; ne ka bulan, iyan eglayag te marusilem. Ne innimu rin degma ka me bituen. 17 Intahu te Manama[gl] ka me malayag diye te langit eyew egteng-ew te kalibutan, 18 wey eyew eglayag te maaldew wey te marusilem, wey eyew egpegsuwey te malayag wey te delem. Ne natelesan ka Manama[gl] te nakita rin. 19 Ne nasagkup e wey napawe, ne seeye ka igkeep-at ne aldew.

20 Ne migkahi ka Manama,[gl]Egpekeempet kayi te weyig ka nakalkalasi ne me ngalap wey egpekeempet degma diye te aw-awangan ka nakalkalasi ne me manuk-manuk.” 21 Sikan naa, innimu te Manama[gl] ka me bubuyahen ne me ngalap diye te dahat wey ka nakalkalasi ne me ngalap diye te weyig wey ke diye te dahat, wey ka nakalkalasi degma ne me manuk-manuk. Ne natelesan ka Manama[gl] te nakita rin. 22 Ne impanalanginan sikandan te Manama[gl] te migkahi, “Kabuhal kew. Sikaniyu se me ngalap te weyig, empeta niyu ka dahat, ne sikaniyu se me manuk-manuk, empeta niyu ka kalibutan.” 23 Ne nasagkup e wey napawe, ne seeye ka igkalimma ne aldew.

24 Ne migkahi ka Manama,[gl]Egkeyimu kayi te ampew te tane ka nakalkalasi ne me mananap, ka me ayam wey ka me mahintalunan, ka derakel wey mallintek ne me mananap.” Te sikan de, neyimu e. 25 Sikan naa, innimu rin ka langun ne nakalkalasi ne me ayam wey me mahintalunan. Ne natelesan ka Manama[gl] te nakita rin.

26 [xr]Ne migkahi man-e ka Manama,[gl]Eggimu ki te etew ne iling kanta. Sikandan ka egbuut te me ngalap te weyig, me manuk-manuk, me ayam, wey te langun ne mahintalunan, ka derakel wey ka mallintek ne me mananap.” 27 [xr][xr]Sikan naa, innimu te Manama[gl] ka etew iling kandin. Innimu rin ka lukes wey ka malitan. 28 Ne impanalanginan sikandan te Manama[gl] ne migkahi, “Kabuhal kew eyew egpekeempet ka kabuhalan niyu kayi te ampew te tane wey sikandan ka egbuut te langun. Sikaniyu ka egbuut te me ngalap te weyig, me manuk-manuk wey te langun ne mananap. 29 Igbehey ku kaniyu ka langun ne pinamula ne egbebehas wey ka me behas te kayu, eyew egkeenen niyu. 30 Igbehey ku degma te langun ne me mananap, me manuk-manuk, wey te langun ne egmanggeheyinawa ka me pinamula ne meilem eyew egkeenen dan.” Te sikan de, neyimu e. 31 Ne nakita te Manama[gl] ka langun ne innimu rin wey natelesan amana sikandin. Ne nasagkup e wey napawe, ne seeye ka igkeen-em ne aldew.

2Sikan naa, napenge e te miggimu ka langit wey ka kalibutan wey ka langun ne nakatahu due. [xr][xr]Te igkapitu ne aldew, miggimeley e ka Manama[gl] su napenge e ka langun ne innimu rin. Indakelan din ka igkapitu ne aldew wey immatulus din seini, su miggimeley e sikandin te sika ne aldew te langun ne eggimuwen din.

Iling kayi ka guhuren meyitenged te peggimu te kalibutan wey te langit.

Ka inged ne egngaranan te Idin

Te peggimu te Magbebaye[gl] ne Manama[gl] te langun,ware pad me pinamula wey me hilamunen ne nanubu te tane, su ware din pad peurani, wey ware pad etew ne egbasuk. Minsan ware pad uran, piru migmakames e ka tane su duen e weyig ne migligkat diye te diralem te tane.

[xr]Ne migkuwa ka Magbebaye[gl] ne Manama[gl] te tane wey innimu rin ne etew. Inggiyupan din ka irung te etew te egpekeuyag ne geyinawa, wey miggeheyinawe e ka etew.

Ne miggimu ka Magbebaye[gl] ne Manama[gl] te pinamulaan diye te Idin ne diye dapit te igsile, wey diye din ipeugpe ka etew. [xr]Ne impatubuan seeye te Magbebaye[gl] ne Manama[gl] te langun ne nakalkalasi ne kayu ne mateles wey meupiya ne egkeenen se behas. Diye te taliware te pinamulaan, due kayu ne egpakabehey te umul, wey due degma kayu ne egpakabehey te katuenan ke nekey ka meupiya wey ke nekey ka mareet.

10 Ne due weyig ne diye mig-ulun te Idin ne nakaweyig te seeye ne pinamulaan. Ligkat dutu, migsisiyak seeye te hep-at ne siyak. 11 Ka an-anayan ne siyak, egngaranan te Pisun ne migpeendiye te inged ne egngaranan te Habila ne due bulawan. 12 (Dutu ne inged egkakita ka neelin ne bulawan, mahal ne peemut ne egngaranan te birilyum, wey ka egpangilak-ilak ne me batu ne egngaranan te uniks.) 13 Ka igkarangeb ne siyak, egngaranan te Gihun ne migpeendiye te inged ne egngaranan te Kus. 14 Ka igkatelu ne siyak, egngaranan te Tigris ne migleus diye dapit te igsile te Asiriya. Ka igkeep-at ne siyak, egngaranan te Iyupratis.

15 Ne diye ipeugpe te Magbebaye[gl] ne Manama[gl] te pinamulaan te Idin ka lukes eyew egbasuk wey egtanggu dutu. 16 Migkahiyan din ka lukes, “Egkaayun ka ne egpakakeen te behas te minsan nekey ne kayu kayi te pinamulaan, 17 piru kene ka keen te behas te kayu ne egpakabehey te katuenan ke nekey ka meupiya wey ke nekey ka mareet. Ke egkeen ka te behas te sika ne kayu, egkapatey ka iya.”

18 Ne migkahi ka Magbebaye[gl] ne Manama,[gl]Kene ne meupiya ne egsabsabeka seini se etew. Keilangan ne eggimuwan ku sikandin te talagbulig ne eleg kandin.”

19 Sikan naa ka miggimu ligkat te tane ka Magbebaye[gl] ne Manama[gl] te langun ne me mananap wey me manuk-manuk wey impanguyan din seeye diye te etew eyew egpangngaranan sikandan. Minsan nekey ka igngaran te etew te tagse sabeka kandan, sikan e ka ngaran dan. 20 Ne impangngaranan e te etew ka langun ne me mananap, me ayam, me mahintalunan wey me manuk-manuk. Piru warad iya nakita te etew ne eleg ne egpakabulig kandin.

21 Purisu impaliplipereng te Magbebaye[gl] ne Manama[gl] ka etew. Te nakaliplipereng e sikandin, in-angey e te Manama[gl] ka gusuk din wey impakimut din ded ka pali. 22 Ne innimu rin ne malitan ka gusuk ne in-angey rin diye te lukes, wey in-uyan din e ka malitan diye te lukes. 23 Te pegkakita te lukes te malitan, migkahi e sikandin,

Te! Seinid en iya ka iling keddi!

Ka tul-an din, migligkat te keddi ne tul-an, wey ka sapu din, migligkat degma te keddi ne sapu.

Malitanka ngaran din[fn] su in-angey man de ligkat te lukes.”

24 [xr]Sika ka egpuunan ne eg-engked ka lukes te amey wey iney rin, wey eglunggun e sikandin te asawa rin, wey egkasabeke e sikandan se daruwa.

25 Ne sikandan se alunggun, migpalawas, piru ware sikandan neyilew.

Migsupak ka etew te Manama[gl]

3[xr]Na, due uled ne iyan ka amana ne utekan te langun ne mananap ne innimu te Magbebaye[gl] ne Manama.[gl] Mig-insaan te uled ka malitan, “Ingkenaan kew bes te Manama[gl] ne egkeen te langun ne behas te me kayu kayi te pinamulaan?”

Ne migtabak ka malitan, “Egkaayun key ne egkeen te behas te minsan nekey ne kayu kayi te pinamulaan gawas te behas te kayu ne kayi te taliware. Impanpanayan key te Manama[gl] ne kene egpakeenen wey minsan egsamsam naan de te behas te sika ne kayu su eyew kene key egkapatey.”

Piru migkahi ka uled, “Kene ne malehet ne egkapatey kew. Nakahi sika te Manama[gl] su nakataha sikandin ne emun ke egkeen kew due, egkapuwasan ka isip niyu wey egpekeiling kew kandin ne egpakataha ke nekey ka meupiya wey ke nekey ka mareet.”

Te pegkakita te malitan ne mateles ka kayu wey mananam buwa ne egkeenen ka behas, neeyaman sikandin ne egpupu eyew egpakakuwa te katuenan. Purisu, migpupu e sikandin wey ingkeen din e. Ne imbehayan din ka asawa rin wey migkeen e degma sikandin. Te nakapenge e sikandan ka migkeen, napuwasan e ka isip dan wey nakamaan-maan e sikandan ne migpalawas bes sikandan. Tenged due, migkuwa sikandan te me dewun te kayu ne iggira[gl] wey impaneyi dan e seini eyew igbebaag dan.

Te pegkasagkup e, nakarineg sikandan te pegderahebdeb te Magbebaye[gl] ne Manama[gl] diye te pinamulaan, ne dutu miggeles e sikandan diye te kakayuwan. Piru in-umew te Magbebaye[gl] ne Manama[gl] ka lukes, “Hendei kad e?”

10 Ne migtabak ka lukes, “Nakarineg a te pegderahebdeb nu kayi te pinamulaan wey miggeles ad e su naaldek a tenged su migpalawas a.”

11 Ne mig-inse ka Manama,[gl]Hentew-a ka mignangen keykew ne migpalawas ka? Migkeen ka te behas te kayu ne ingkene ku keykew?”

12 Ne migtabak ka lukes, “Ka malitan ne imbehey nu keddi ka migbehey keddiey te behas te kayu. Sikan naa ka nakakeen a.”

13 [xr]Ne mig-insaan te Magbebaye[gl] ne Manama[gl] ka malitan, “Mania te innimu nu seini?”

Ne migtabak ka malitan, “In-akalan a te uled. Sikan naa ka nakakeen a te behas te kayu.”

Ka peglegpad te Manama[gl] tenged te sale

14 Ne migkahiyan te Magbebaye[gl] ne Manama[gl] ka uled,

Tenged su innimu nu sika, eglegparan ku sikeykew. Te langun ne me mananap, sikeykew re ka egdilusen. Ligkat kuntee, egdul-ug kad e wey egkeen kad te alinepung taman te egpatey ka.

15 [xr]Egpegkuntereen ku sikaniyu te malitan wey ka me kabuhalan niyu degma. Egdekdeken te kabuhalan din ka ulu nu wey egkahaten nu degma ka palu rin.”

16 Ne migkahiyan te Manama[gl] ka malitan,

Tenged te innimu nu sika, egtimulan ku ka peg-antus nu te peg-anak nu wey masakit ka egkaheram nu ke eglesutan ka. Piru minsan pad due, dakel red ka isip nu te asawa nu wey[fn] sikandin ka egbuut keykew.”

17 [xr]Ne migkahiyan te Manama[gl] ka lukes ne si Adan,

Tenged te mig-alak ka te asawa nu wey migkeen ka te behas te kayu ne ingkene ku keykew, egdilusen ku ka tane.

Ligkat kuntee, wey re egpanubu ka pinamula nu ke egkabaybayaran ke pad ne egbasuk.

18 Egpanubu diye te tane ka me hilamunen wey ka me duhi, wey egkeen ka te me pinamula ne egpanubu diye te kamet. 19 Ne wey ka egpakahaani te pinamula nu, ke egkabaybayaran ke pad ne egbasuk wey egtihis pad ka limuseng nu. Egkataman, egpakalibed ka diye te tane ne migligkatan nu. Su innimu ka ligkat te tane ne egpakalibed ke red diye te tane.”

20 Nataman, migngaranan ni Adan ka asawa rin ki Iba[fn] su sikandin ma ka iney te langun ne etew. 21 Ne innimuwan te Magbebaye[gl] ne Manama[gl] ensi Adan wey si Iba te manggad ne migligkat te Mananap wey impakumbalaan din e sikandan.

Ka pegdeldel ki Adan wey ki Iba ligkat te pinamulaan

22 [xr]Ne migkahi ka Magbebaye[gl] ne Manama,[gl]Kuntee, nekeiling e ka etew kanta ne nakataha ke nekey ka meupiya wey ke nekey ka mareet. Keilangan ne kene egpakapupu wey egpakakeen sikandan te behas te kayu ne egpakabehey te umul, su keilangan ne kene egkeuyag sikandan te ware egtamanan.” 23 Sikan naa ka indeldel e sikandan te Magbebaye[gl] ne Manama[gl] ligkat te pinamulaan te Idin wey egpabasuken e si Adan diye te tane ne inligkatan din.

24 Ne impaawe e te Manama[gl] ka alunggun, wey intahuan din e te me talagtameng ne panalihan ne egngaranan tekirubin[gl]ka diye dapit te igsile te pinamulaan te Idin. Ne imparuma rin ka kampilan ne egkalegleg wey egkatileng su eyew ware etew ne egpakadani-rani te kayu ne egpakabehey te umul.

Si Kain wey si Abil[gl]

4Ne migpewulirey e ka alunggun ne si Adan wey si Iba. Nataman, naberes e si Iba wey miglesutan e te lukes. Migkahi si Iba, “Nakaanak a te lukes ligkat te pegbulig te Magbebaye[gl] ne Manama[gl].” Purisu ingngaranan din ka bate ki Kain.[fn] Nataman, nakaanak e man-e sikandin te lukes ne ingngaranan din ki Abil[gl]. Hengkayi te migtulin e ka tahasuled, neyimu si Abil[gl] ne talagtameng te me karniru[gl] wey si Kain neyimu ne talabasukan. Te sabeka ne aldew, mig-angey si Kain te me behas te pinamula rin ne inhalad din diye te Magbebaye[gl] ne Manama.[gl] [xr]Piru mig-angey mule si Abil[gl] te me panganey ne anak te me ayam din, ne impanlape din seeye wey in-alam din ka subla ne meupiya ne baad dutu wey impanubad din te Magbebaye[gl] ne Manama.[gl] Ne nahale amana ka Magbebaye[gl] ne Manama[gl] ki Abil[gl] wey te impanubad din, piru ware sikandin nahale ki Kain wey te inhalad din. Purisu, subla ne nabelu si Kain wey migpaasemud sikandin. Ne migkahiyan te Magbebaye[gl] ne Manama[gl] si Kain, “Mania te egkabelu ka wey migpaasemud ka? Ke meupiya ka eggimuwen nu, egdawaten ku perem ka halad nu. Piru ke mareet ka eggimuwen nu, ka sale ka egmandu keykew. Su ka sale egpekeiling te uled ne eg-atang keykew eyew egkahaten ka. Purisu keilangan ne egkatalu nu ka sale.”

[xr]Nataman, migkahiyan ni Kain ka hari rin ne si Abil[gl], “Kuwa kid e Abil[gl]. Eggendiye ki te kamet.” Te diyad e sikandan te kamet, in-uney e himatayi ni Kain ka hari rin.

Ne mig-insaan te Magbebaye[gl] ne Manama[gl] si Kain, “Hendeid e ka hari nu ne si Abil[gl]?”

Ne migtabak si Kain, “Hanew te la! Maa sikeddi ka talaggaat te hari ku su!”

10 [xr]Ne migkahi ka Magbebaye[gl] ne Manama[gl] ki Kain, “Mania te neyimu nu sika se mareet ne himu? Te pegkakita ku te langesa te hari nu diye te tane, iling te egpakarineg a te laheng din ne egbuyu te pegsuli. 11 Tenged te innimu nu, igdilus ka. Puun kuntee, kene kad e egpakabasuk te tane ne inleneban te langesa te hari nu. 12 Ke egpamula ka, ka tane kenad egbehey te egkahaani. Ne eggeles-heles ka wey egkalaag-laag kad e kayi te ampew te tane.”

13 Ne migkahiyan ni Kain ka Magbebaye[gl] ne Manama,[gl]Mabehat amana ka iglegpad nu keddi. 14 Indeldel a nikeykew ligkat te seini ne tane wey diye te tangkaan nu. Eggeles-heles ad wey egkalaag-laag ad kayi te ampew te tane, wey eggimatayan ad te minsan hentew ne egpakakita keddiey.”

15 Piru migtabak ka Magbebaye[gl] ne Manama[gl] kandin, “Kene, su sika se egpekeyimatey keykew, eglegparan ku degma te pitu ne lupi.” Sikan naa, intahuan te Magbebaye[gl] ne Manama[gl] te tuus si Kain su eyew kene egkeyimatayan te egpakakita kandin. 16 Te sikan de iya, mig-awe e si Kain diye te tangkaan te Magbebaye[gl] ne Manama[gl] wey diyad e mig-ugpe te inged ne egngaranan te Nud,[fn] ne diye dapit te igsile ligkat te Idin.

Ka me kabuhalan ni Kain

17 Ne migpewulirey e si Kain te asawa rin, nataman, naberes e ka asawa rin wey mig-anak te lukes ne migngaranan dan ki Inuk. Ne migpasasindeg si Kain te siyudad ne migngaranan din ki Inuk, su impasangey rin te anak dan ne panganey. 18 Si Inuk, nakaanak ki Irad. Ne si Irad, nakaanak ki Mihuhail. Ne si Mihuhail, nakaanak ki Mitusail. Ne si Mitusail, nakaanak ki Lamik. 19 Ne si Lamik, migduruwey. Si Ada wey si Sila ka ngaran te me asawa rin. 20 Si Ada nakaanak e ki Habal. Ne si Habal ka migligkatan te talaayamen ne mig-ugpe diye te me balungbalung. 21 Due inggiba ni Habal ne egngaranan ki Hubal. Si Hubal ka migligkatan te langun ne egkateu ne egpanguglung wey egpamulendag. 22 Ne miglesutan e degma si Sila ki Tubalkain. Si Tubalkain ka an-anayan ne talagpanayab te burunsi wey me putew. Due atebey ni Tubalkain ne egngaranan ki Naama. 23 Ne migkahiyan ni Lamik ka daruwa ne asawa rin,

Ada, Sila, pammineg kew keddi.

Nakapatey a te kanakan ne nakapali keddi.

24 Ke pitu ne lupi ka igsuli te etew ne egpakapatey ki Kain,

pitu ne pulu wey pitu (77) mule ne lupi ka igsuli te etew ne egpakapatey keddi.”

Ka me kabuhalan ni Sit

25 Ne migpewulirey e man-e si Adan wey si Iba wey nakaanak e man-e te lukes. Migkahi si Iba, “Imbehayan ad e man-e te Manama[gl] te anak ne lukes ne inliwan din ki Abil[gl] ne innimatayan ni Kain.” Sikan naa, ingngaranan din ka bate ki Sit.[fn] 26 Si Sit nakaanak te lukes ne migngaranan din ki Inus. Te seeye ne timpu, migbunsud ka me etew ne mig-ampu wey migsaye te Manama,[gl] wey Magbebaye[gl] ne Manama[gl] ka ngaran din ne ig-umew ran.

Ka me kabuhalan ni Adan

(1 Kru 1:1‑4)

5[xr]Seini ka pangguhuren meyitenged te me kabuhalan ni Adan. (Te peggimu te Manama[gl] te me etew, innimu rin sikandan ne iling kandin. [xr]Innimu rin sikandan ne lukes wey malitan wey impanalanginan din sikandan wey ingngaranan din teEtew.”) Te 130 e ka idad ni Adan, nakaanak pad sikandin te lukes ne migsupu kandin ne ingngaranan din ki Sit. Pegkeetew ni Sit, neuyag pad si Adan seled te walu (800) ne gatus ne leg-un, wey nakaanak pad man-e sikandin te me lukes wey me malitan. Migginguma pad te 930 ka idad ni Adan ne hendue migpatey sikandin.

Te 105 e ka idad ni Sit, nakaanak sikandin te lukes ne si Inus. Pegkeetew ni Inus, neuyag pad si Sit seled te 807 ne leg-un, wey nakaanak pad man-e sikandin te me lukes wey me malitan. Migginguma pad te 912 ka idad ni Sit ne hendue migpatey sikandin.

Te siyam e ne pulu (90) ka idad ni Inus, nakaanak sikandin te lukes ne si Kinan. 10 Pegkeetew ni Kinan, neuyag pad si Inus seled te 815 ne leg-un, wey nakaanak pad man-e sikandin te me lukes wey me malitan. 11 Migginguma pad te 905 ka idad ni Inus ne hendue migpatey sikandin.

12 Te pitu e ne pulu (70) ka idad ni Kinan, nakaanak sikandin te lukes ne si Mahalalil. 13 Pegkeetew ni Mahalalil, neuyag pad si Kinan seled te 840 ne leg-un, wey nakaanak pad sikandin te me lukes wey me malitan. 14 Migginguma pad te 910 ka idad ni Kinan ne hendue migpatey sikandin.

15 Te hen-em e ne pulu wey lalimma (65) ka idad ni Mahalalil, nakaanak sikandin te lukes ne si Harid. 16 Pegkeetew ni Harid, neuyag pad si Mahalalil seled te 830 ne leg-un, wey nakaanak pad man-e sikandin te me lukes wey me malitan. 17 Migginguma pad te 895 ka idad ni Mahalalil ne hendue migpatey sikandin.

18 Te 162 e ka idad ni Harid, nakaanak sikandin te lukes ne si Inuk. 19 Pegkeetew ni Inuk, neuyag pad si Harid seled te walu ne gatus (800) ne leg-un, wey nakaanak pad man-e sikandin te me lukes wey me malitan. 20 Migginguma pad te 962 ka idad ni Harid ne hendue migpatey sikandin.

21 Te hen-em e ne pulu wey lalimma (65) ka idad ni Inuk, nakaanak sikandin te lukes ne si Mitusila. 22 Te pegkeetew ni Mitusila, amana ne talag-alukuy si Inuk te Manama[gl] seled te tatelu ne gatus (300) ne leg-un, wey nakaanak pad man-e si Inuk te me lukes wey me malitan. 23 Purisu migginguma te 365 ka idad din. 24 [xr]Ne amana talag-alukuy si Inuk te Manama.[gl] Nataman, warad e kitaa si Inuk su imbatun e sikandin te Manama.[gl]

25 Te 187 e ka idad ni Mitusila, nakaanak sikandin te lukes ne si Lamik. 26 Pegkeetew ni Lamik, neuyag pad si Mitusila seled te 782 ne leg-un, wey nakaanak pad sikandin te me lukes wey me malitan. 27 Migginguma pad te 969 ka idad ni Mitusila ne hendue migpatey sikandin.

28 Te 182 e ka idad ni Lamik, nakaanak sikandin te lukes 29 wey migngaranan din sikandin ki Nuwi[gl][fn] su migkahi sikandin, “Seini ne bate ka egpakabulig kanta te keyirapan ta tenged te pegdilus te Magbebaye[gl] ne Manama[gl] te tane.” 30 Pegkeetew ni Nuwi,[gl] neuyag pad si Lamik seled te 595 ne leg-un, wey nakaanak pad man-e sikandin te me lukes wey me malitan. 31 Migginguma pad te 777 ka idad ni Lamik ne hendue migpatey sikandin.

32 Te miglalimme e ne gatus (500) ka idad ni Nuwi,[gl] nakaanak sikandin te tatelu ne lukes ne ensi Sim, si Ham, wey si Hapit.

Ka mareet ne me himu te me etew

6[xr]Nataman, migmasalig e ka me etew kayi te ampew te tane, wey migmasalig e degma ka anak dan ne me malitan. Te pegkakita te me anak te Manama[gl] ne mateles amana ka me mengebay, impangasawa ran e ka igkeupii ran. Ne migkahi ka Magbebaye[gl] ne Manama,[gl]Kena a egkeupian ne egkeuyag ka me etew te ware egtamanan, su etew re sikandan. Egbehayan ku naan de sikandan te 120 ne leg-un, ne egkataman, egparusaan kud sikandan.” [xr]Te seeye ne timpu wey minsan pad te egpakasinundul ne me leg-un, due me eleggasi kayi te ampew te tane. Sikandan ka me kabuhalan te seeye se me anak te Manama[gl] ne nakapangasawa te me mengebay. Ka me eleggasi ka me bahani wey migbantug ne me etew te dengan ne timpu.

[xr]Nakita te Magbebaye[gl] ne Manama[gl] ne egkanas-nasian e ka mareet ne hinimuwan te me etew kayi te ampew te tane. Mareet layun ka langun ne egsumsumanen dan wey ka igkeupii ran. Ne dutu, nekegsendit e ka Magbebaye[gl] ne Manama[gl] te neyimu rin ka etew ne kayi te ampew te tane, wey miglungku e sikandin. Purisu migkahi e sikandin, “Egguleen ku kayi te ampew te tane ka me etew ne innimu ku. Egguleen ku degma ka langun ne me mananap wey me manuk-manuk su nekegsendit a te neyimu ku sikandan.” Piru, due sabeka ne etew ne ingkahale te Magbebaye[gl] ne Manama,[gl] sikandin si Nuwi.[gl]

Ka arka ne innimu ni Nuwi[gl]

[xr]Seini ka pangguhuren meyitenged ki Nuwi.[gl] Si Nuwi,[gl] matareng ne etew sikandin, ware igkarew-ey kandin te seeye ne timpu, wey talag-alukuy sikandan te Manama.[gl] 10 Ne due tatelu ne anak din ne ensi Sim, si Ham, wey si Hapit.

11 Piru nakita te Manama[gl] ne mareet ka duma ne me etew, wey nekeempet e ka mareet ne hinimuwan dan kayi te ampew te tane. 12 Nakita rin ne mareet e ka kalibutan su subla ne malindit ka hinimuwan te langun ne etew.

13 Ne migkahiyan te Manama[gl] si Nuwi,[gl]Egguleen ku ka langun ne etew su nekeempet e ka mareet ne hinimuwan dan kayi te ampew te tane. Eggukuman ku sikandan duma te kalibutan. 14 Purisu, kuwa ka te kayu ne egngaranan te gupir wey himu ka te arka. Paninabengi nu naa ka seled, wey pamiketa nu ka seled wey ka lihawangan. 15 Himuwa nu seini ne 133 ne mitrus ka kalayat, daruwa ne pulu wey daruwa (22) ne mitrus ka kaluag, wey sapulu wey tatelu (13) ne mitrus ka katikang. 16 Atepi nu naa seini wey tukehi nu te liware te mitrus ka batang te lilliyungan. Himuwa nu seini ne tatelu ne andana wey himuwi nu te gumawan diye te kakiliran. 17 Egpasipukan ku ka kalibutan eyew egkahule ka langun ne miggeheyinawa. Egkammatey ka langun, 18 piru eggimu a te kasabutan ta te daruwa. Untud kew se alunggun te arka duma te me anak nu wey te me asawa ran. 19-20 Paseled ka diye te arka te tigsabeka ne lunggunan te langun ne nakalkalasi ne me mananap, me manuk-manuk, wey te langun ne egdul-ug. Eggendue sikandan keykew su eyew kene sikandan egkengamatey. 21 Uyan ka man-e te nakalkalasi te egkakeen wey itines nu su eyew due egkakeen niyu wey te me mananap.” 22 [xr]Ne intuman ni Nuwi[gl] ka langun ne insuhu te Manama[gl] kandin.

Ka pegsipuk te weyig

7Nataman, migkahiyan e te Magbebaye[gl] ne Manama[gl] si Nuwi,[gl]Untud kew e ka taltalaanak te arka, su te langun ne me etew kayi te ampew te tane, sikeykew re ka nakita ku ne matareng. Uyan ka te tigpitu ne lunggunan te langun ne nakalkalasi ne me mananap ne in-isip ne malinis.[fn] Piru ka me mananap ne in-isip ne malindit, tigsalimbeka re ne lunggunan uyana nu. Uyan ka man-e te tigpitu ne lunggunan te langun ne nakalkalasi ne me manuk-manuk te aw-awangan, eyew egkabuhal pad sikandan kayi te ampew te tane. Te igkapitu ne aldew kuntee, egpeuranen ku te hep-at ne pulu (40) ne aldew wey hep-at ne pulu (40) ne karusileman eyew egkengamatey ka langun ne innimu ku kayi te ampew te tane.” Ne intuman ni Nuwi[gl] ka langun ne insuhu kandin te Magbebaye[gl] ne Manama.[gl]

Te impasipukan ka kalibutan, hen-em e ne gatus (600) ka idad ni Nuwi.[gl] [xr]Ne mig-untud e te arka si Nuwi[gl] duma te asawa rin wey te me anak din duma te me ran eyew kene egkammatey te pegsipuk te weyig. Seeye se in-isip ne malinis wey ke malindit naa ne me mananap, me manuk-manuk, wey ka langun ne egdul-ug, nekeglunggun sikandan ka nanguntud te arka duma ki Nuwi[gl] sumale te insuhu te Manama[gl] kandin. 10 Pegkapenga te pitu ne aldew, migbunsud e ka weyig ne migsipuk te kalibutan.

11 [xr]Te seeye ne timpu, hen-em e ne gatus (600) ka idad ni Nuwi.[gl] Te igkasapulu e wey pitu (17) ne aldew te igkarangeb ne bulan, naluwangan e ka langun ne sebseb wey nabusbus e ka langun ne weyig ne diye te langit. 12 Ne mig-uranan ka kalibutan seled te hep-at ne pulu (40) ne aldew wey hep-at ne pulu (40) ne karusileman. 13 Te aldew ne migbunsud e mig-uran, mig-untud e si Nuwi[gl] te arka duma te asawa rin wey ka tatelu ne me anak dan, ne ensi Sim, si Ham, wey si Hapit wey ka me ambey ran. 14 Ne nanguntud degma duma kandan ka langun ne nakalkalasi ne me mananap, ka me mahintalunan wey ka me ayam, ka me derakel wey me mallilintek, wey ka langun ne nakalkalasi ne me manuk-manuk. 15 Nekeglunggun ka langun ne klasi te mananap ne induma ni Nuwi[gl] te mig-untud te arka, 16 sumale te insuhu te Manama.[gl] Nataman, inlekeban e te Magbebaye[gl] ne Manama[gl] ka gumawan te arka.

17 Ware migkerit ka uran seled te hep-at ne pulu (40) ne aldew, wey migdakel e ka weyig wey mig-antew e ka arka. 18 Ne migpanaman-taman migtulin ka weyig wey migduu e, wey mig-antew-antew e ka arka diye te weyig. 19 Tenged te nasublaan e ka pegdakel te weyig, natimpaan e ka me bubungan kayi te ampew te tane, minsan me matikang. 20 Natimpaan ka me iddus te bubungan te me pitu ne mitrus. 21 Sikan naa, nahule ka langun ne eggeheyinawaka langun ne me manuk-manuk wey ka langun ne me mananap, mahintalunan wey ayam, wey ka langun ne etew. 22 Naamin nammatey ka eggeheyinawa kayi te ampew te tane. 23 Inggule te Magbebaye[gl] ne Manama[gl] ka langun kayi te kalibutan, ne si Nuwi[gl] naan de wey ka me duma rin ne nekeuntud te arka ka ware nammatey. 24 Ne nabunbunan te weyig ka kalibutan seled te 150 ne aldew.

Ka pegtigkus te weyig

8Te seeye ne timpu, ware ded nalingawi te Manama[gl] ensi Nuwi[gl] wey ka langun ne me mananap ne duma rin diye te arka. Seeye naa, impakalamahan din ka kalibutan wey nabunsuran e degma migtigkus ka weyig. Ne insengseng din e ka langun ne me sebseb wey ka langun ne imbayaan te weyig ne diye te langit, wey migkerit e ka uran. Ne migpabulus migtigkus ka weyig. Te miggingume e te 150 ne aldew ka pegsipuk te weyig, nakasanglad e ka arka diye te me bubungan diye te Ararat te igkasapulu wey pitu (17) ne aldew te igkapitu ne bulan. Ne migpabulus migtigkus ka weyig taman te egkakite e ka iddus te me bubungan te an-anayan ne aldew te igkasapulu ne bulan.

Te miglihad e ka hep-at ne pulu (40) ne aldew, inlukatan e ni Nuwi[gl] ka bintana te arka. Ne dutu inlekaan din e ka sabeka ne uwak, wey miglayang-layang e seini taman te neetiyan e ka weyig. Nataman inlekaan e man-e ni Nuwi[gl] ka sabeka ne seleppati eyew egkanengnengan din ke mababew e ka weyig. Piru ware egkalatunan te seleppati tenged su maralem pad ka weyig, wey miglibed e sikandin diye ki Nuwi[gl] diye te arka. Ne impalatun ni Nuwi[gl] ka seleppati diye te belad din wey impaseled e diye te arka. 10 Ne migtetahad pad sikandin te pitu ne aldew, ne miglekaan din e man-e ka seleppati. 11 Te egkasagkup e, miglibed e ka seleppati ne migbange te meilem ne dewun te kayu ne ulibu[gl]! Sikan naa, nakanengneng e si Nuwi[gl] ne mababew e ka weyig. 12 Nataman migtetahad pad man-e si Nuwi[gl] te lein ne pitu ne aldew, ne inlekaan din e man-e ka seleppati, wey warad seini miglibed.

13 Te 601 e ka idad ni Nuwi,[gl] te an-anayan ne aldew te an-anayan ne bulan, neetiyan en iya ka weyig. Ne inlekat ni Nuwi[gl] ka atep te arka wey migpamantew sikandin, ne dutu, nakita rin ne nammare e ka tane! 14 Te igkararuwa ne pulu wey pitu (27) ne aldew te igkarangeb ne bulan, migmammare en iya ka tane.

15 Ne migkahiyan te Manama[gl] si Nuwi,[gl] 16 Lihawang kew e due te arka ka taltalaanak duma te me ambey nu. 17 Palihawanga nud e degma ka langun ne me mananap wey me manuk-manuk eyew egkabuhal wey egpekeempet kayi te ampew te tane.” 18 Seeye naa, miglihawang e ensi Nuwi[gl] ka taltalaanak duma te me ambey rin. 19 Ka langun ne me mananap, ka me mahintalunan wey me ayam, wey ka langun ne me manuk-manuk, nanlihawang e degma diye te arka sumale te kandan ne kalasiyan.

Ka pegpanubad ni Nuwi[gl]

20 Ne miggimu si Nuwi[gl] te altar[gl] ne eg-unturan te egtutungen ne mananap, wey mig-angey sikandin te langun ne klasi te mananap wey manuk-manuk ne in-isip ne malinis. Intutung din seeye diye te altar[gl] isip igpanubad diye te Magbebaye[gl] ne Manama.[gl] 21 Te naarek e te Magbebaye[gl] ne Manama[gl] ka lansi, nahale sikandin wey migkahi diye te geyinawa rin, “Kene kud en iya egdilusen ka tane tenged te neyimu te me etew, minsan ke mareet iya ka suman-suman dan ligkat te bate pad sikandan. Kene kud e egguleen ka langun ne eggeheyinawa, iling te neyimu ku.

22 Taheed te duen pad kalibutan,

Duen pad timpu ne egpakapamula wey egpakahaani,

Due timpu ne maagsil wey due timpu ne meinit,

Due degma timpu ne eggulabung wey due degma timpu ne eglengleng,

Due maaldew wey due marusilem.

Seini se langun, kene egkataman.”

Ka kasabutan te Manama[gl] diye ki Nuwi[gl]

9[xr]Impanalanginan te Manama[gl] si Nuwi[gl] wey ka me anak din wey migkahiyan, “Kabuhal kew eyew egpekeempet ka me kabuhalan niyu kayi te ampew te tane. Egkengaaldek kaniyu ka langun ne me mananap, me manuk-manuk, wey me ngalap. Sikaniyu ka egbuut kandan, wey egpakakeen kew e kuntee due. Dengan, iyan ku re imbehey kaniyu ka me pinamula eyew egkeenen niyu. Piru kuntee, igbehey kud degma kaniyu seini se langun eyew egkeenen niyu. [xr]Piru kene kew en iya keen te mananap ne ware naawe ka langesa te peggimatey, tenged su ka langesa ka migligkatan te geyinawa. Ke due etew ne eggimatey te etew, eglegparan ku sikandin. Ke due mananap ne eggimatey te etew, eglegparan ku degma sika. [xr]Minsan hentew ka egbubunu, egbunuen degma sikandin. Su innimu te Manama[gl] ka etew ne nekeiling kandin. [xr]Ne sikaniyu, kabuhal kew naa su eyew egpekeempet kew kayi te ampew te tane.”

Ne migkahiyan te Manama[gl] ensi Nuwi[gl] wey ka me anak din, Kuntee, eggimu a te kasabutan ta wey peendiye te langun ne me kabuhalan niyu, 10 wey peendiye man-e te langun ne eggeheyinawaka me manuk-manuk wey me mananapka langun ne nanlihawang diye te arka duma kaniyu. 11 Seini ka kasabutan ne eggimuwen ku diye te kaniyu: kene kud e egguleen pinaahi te pegpasipuk te weyig ka langun ne eggeheyinawa. Kene kud e eg-abayan te egdereet ka kalibutan pinaahi te pegsipuk te weyig.” 12 Ne migkahi e man-e ka Manama,[gl]Ka palinneu te kasabutan ta wey te langun ne me mananap, wey peendiye te egginguma ne me kabuhalan niyu, 13 iyan ka baluntu ne egpalepawen ku diye te me gapun. Sika ka palinneu te kasabutan ku kaniyu te nangugpe te kalibutan. 14 Tagse eglibulungen ku ka me gapun diye te aw-awangan ne egkakite e ka baluntu, 15 egsumsumanen ku ka kasabutan ta wey peendiye te langun ne me mananap, ne kenad en iya egkahule ligkat te pegsipuk te weyig ka langun ne eggeheyinawa. 16 Emun ke eglepew e ka baluntu diye te me gapun, egpitawen ku seini wey egsumsumanen ku ka ware egtamanan ne kasabutan ta wey peendiye te langun ne eggeheyinawa kayi te ampew te tane. 17 Sika ka palinneu te innimu ku ne kasabutan ta wey peendiye te langun ne eggeheyinawa kayi te ampew te tane.”

Ka me anak ni Nuwi[gl]

18 Seini ka me anak ni Nuwi[gl] ne nanlihawang diye te arkasi Sim, si Ham wey si Hapit. (Ne si Ham ka amey ni Kanaan.)[gl] 19 Seini se tatelu ne anak ni Nuwi,[gl] iyan migligkatan te langun ne etew kayi te ampew te tane.

20 Si Nuwi,[gl] talabasukan wey sikandin ka an-anayan ne migpamula te paras.[gl] 21 Due timpu ne mig-inum sikandin te binu ne ligkat te paras,[gl] wey newubug e sikandin. Ne dutu nakalipereng e sikandin ne migpalawas diye te balungbalung din. 22 Ne si Ham ne amey ni Kanaan,[gl] nakita rin ne migpalawas ka amey rin, sikan naa ka migkahiyan din e ka daruwa ne suled din diye te lihawangan. 23 Ne migkuwa si Sim wey si Hapit te manggad wey insampey ran diye te pamanayen dan. Ne mig-isues sikandan ka migseled diye te balungbalung ne migbunbun te amey ran. Warad iya sikandan miglilingey eyew kene dan egkakita ka amey ran ne migpalawas. 24 Nataman, te naalipaspasan e si Nuwi[gl] wey nanengnengan din e ka innimu ni Ham, ka anak din ne igkalitan, 25 migkahi e sikandin,

Egkarilus si Kanaan.[gl] Egkeyimu sikandin ne uripen te me suled din.”

26 Ne migkahi man-e sikandin,

Sayeen ka Magbebaye[gl] ne Manama,[gl] ka Manama[gl] ni Sim!

Egkeyimu ne uripen ni Sim si Kanaan.[gl]

27 Egbuhalen te Manama[gl] si Hapit

wey eglemung ka me kabuhalan din diye te me kabuhalan ni Sim.

Ne egkeuripen degma ni Hapit si Kanaan[gl].”

28 Pegkapenga te pegsipuk te weyig, neuyag pad si Nuwi[gl] te 350 ne leg-un. 29 Ne migpatey sikandin te 950 e ka idad din.

Ka me kabuhalan te me anak ni Nuwi[gl]

(1 Kru 1:5‑23)

10Seini ka pangguhuren meyitenged te me kabuhalan te me anak ni Nuwi[gl] ne si Sim, si Ham, wey si Hapit. Nakaanak sikandan pegkapenga te pegsipuk te weyig.

Ne seini ka me lukes ne anak ni Hapitsi Gumir, si Magug, si Madai, si Haban, si Tubal, si Misik, wey si Tiras. Seini ka me kabuhalan man-e ni Gumirsi Askinas, si Ripat, wey si Tuggarma. Seini ka me kabuhalan ni Habansi Ilisa, si Tarsis, si Kitim, wey si Dudanim. Sikandan ka me kaapuan te me etew ne nekeempet nangugpe diye te ilis te dahat wey diye te me pulu te dahat. Sikandan langun ka me kabuhalan ni Hapit ne nangugpe diye te nalein-lein ne me inged, wey nalein-lein e degma ka me tribu wey linalahan dan.

Ne seini ka me lukes ne anak ni Hamsi Kus, si Ihiptu[gl], si Put, wey si Kanaan.[gl] Seini ka me kabuhalan man-e ni Kussi Siba, si Habila, si Sabata, si Raama, wey si Sabtika. Ne seini degma ka kabuhalan ni Raamasi Saba wey si Dadan. Ne duen pad man-e anak ni Kus ne egngaranan ki Nimrud, ne iyan an-anayan ne bahani kayi te ampew te tane wey subla ne meinges ne mannitingen. Purisu, ke due meinges ne mannitingen, due degma lalahen ne eggenendue, “Egpekeiling seini ne etew ki Nimrud te meinges ne mannitingen.” 10 Ka an-anayan ne me siyudad ne migmanduan ni Nimrud, iyan sika se Babil, Irak, wey Akad. Seini se tatelu ne siyudad sakup te inged ne egngaranan te Sinar. 11 Puun te seeye ne inged, miggendiye si Nimrud te Asiriya wey migpasasindeg sikandin te me siyudad ne Ninibi[gl], Rihubut-ir, Kala, 12 wey Risin ne diye te eletanan te Ninibi[gl] wey te Kala, ka dakel ne siyudad.

13 Ne si Ihiptu[gl], sikandin ka migligkatan te me etew ne matig-Ludim, matig-Anamim, matig-Lahabim, matig-Niptuhim, 14 matig-Pitrusim, matig-Kasiluhim, wey matig-Kapturim (ne migligkatan te me Pilistihanen).

15 Seini ka me anak ni Kanaan,[gl] si Sidun[gl] ka panganey ne anak din, wey si Hit. 16 Si Kanaan[gl] ka migligkatan man-e te me Hibusihanen, me Amurihanen, me Girgasihanen, 17 me Hibihanen, me Arkihanen, me Sinihanen, 18 me Arbadihanen, me Simarihanen, wey me Hamatihanen. Nataman, natalagtag e ka me tribu ne kabuhalan ni Kanaan,[gl] 19 wey nekeempet e sikandan nangugpe puun te Sidun[gl], peendiye te Girara taman te Gasa, peendiye man-e te Suduma[gl], Gumura, Adma wey Sibuwim taman te Lasa. 20 Sikandan langun ka me kabuhalan ni Ham. Ne nalein-lein ne me inged ka nangugpaan dan wey nalein-lein degma ka me tribu wey linalahan dan.

21 Ne ka kakey ni Hapit ne si Sim, iyan migligkatan te langun ne me Hibruwanen. 22 Seini ka me anak din ne lukessi Ilam, si Asur, si Arpaksad, si Lud, wey si Aram. 23 Seini ka me kabuhalan man-e ni Aramsi Us, si Hul, si Gitir, wey si Mas. 24 Ne si Arpaksad, nakaanak ki Sila. Ne si Sila, nakaanak ki Ibir. 25 Daruwa ka lukes ne anak ni Ibirka sabeka egngaranan ki Pilig su nabaad ka me etew kayi te ampew te tane te seeye ne timpu. Ne si Huktan ka ngaran te suled din. 26 Ne si Huktan ka migligkatan enni Almudad, ni Silap, ni Hasarmabit, ni Hira, 27 ni Haduram, ni Usal, ni Dikla, 28 ni Ubal, ni Abimail, ni Siba, 29 ni Upir, ni Habila, wey ni Hubab. Sikandan langun ka me anak ni Huktan. 30 Diye sikandan nangugpe te inged ligkat te Misa taman te Sipar ne diye te me bubungan ne dapit te igsile. 31 Sikandan langun ka me kabuhalan ni Sim. Ne nalein-lein ne me inged ka nangugpaan dan wey nalein-lein e degma ka me tribu wey linalahan dan.

32 Sikandan langun ka me kabuhalan te me anak ni Nuwi[gl] ne neyimu ne nalein-lein ne me nasud sumale te me kaap-apuan dan. Te pegkeimpus te pegsipuk te weyig, natalagtag e sikandan minsan hendei.

Ka titikangi ne baley diye te Babil

11Te an-anayan, sabeka re ka linalahan te me etew kayi te ampew te tane. Te nangalin e ka me etew ne diye egpuun te igsile, nekeuma sikandan diye te maluag ne napu ne egngaranan te Sinar wey diyad e sikandan nangugpe. 3-4 Ne migpalalahey sikandan ne miggenendue, “Eggimu ki te siyudad ne due titikangi ne baley ne egpekeuma diye te langit su eyew egmabantug ka ngaran ta wey eyew kene ki egpekegsuwey-suwey kayi te ampew te tane. Egpangimu ki te tisa ne egdalapen ta te hapuy su eyew egmakehal.” Sikan naa, migpangimu sikandan te me tisa wey migkuwa te piket su eyew egpegdekketen dan ka me tisa.

Ne migpamaneug ka Magbebaye[gl] ne Manama[gl] eyew te pegleuy te siyudad wey te baley ne titikangi ne eggimuwen te me etew. Ne migkahi ka Magbebaye[gl] ne Manama,[gl]Pitew kew! Nasabeka ka seini ne me etew wey sabeka re ka linalahan dan. Ne seini se inggimu ran bunsuranan pad te egpangimuwen dan. Te kene egkaluhey, egpekeyimu e sikandan te langun ne igkeupii ran. Na,” kahi te Magbebaye[gl] ne Manama,[gl]egpamaneug ki eyew egpegsewuhen ta ka kandan ne linalahan su eyew kene egpekegsabutey sikandan.” Sikan naa ka immegsuwey-suwey e sikandan te Magbebaye[gl] ne Manama[gl] kayi te intiru ne kalibutan wey warad e nakabulus sikandan ka eggimu te siyudad. Purisu Babil[fn] ka ngaran te siyudad su diye libeha te Magbebaye[gl] ne Manama[gl] ka langun ne linalahan, wey diye migligkat ne impegsuwey-suwey rin sikandan kayi te intiru ne kalibutan.

Ka me kabuhalan ni Sim

(1 Kru 1:24‑27)

10 Ne seini ka me kabuhalan ni Sim. Te miglihad e ka daruwa ne leg-un te pegsipuk te weyig, mahatus (100) e ka idad ni Sim wey nakaanak e sikandin te lukes ne si Arpaksad. 11 Nataman, neuyag pad si Sim seled te lalimma pad ne gatus (500) ne leg-un, wey nakaanak pad man-e sikandin te me lukes wey me malitan.

12 Te tatelu e ne pulu wey lalimma (35) ka idad ni Arpaksad, nakaanak sikandin te lukes ne si Sila. 13 Nataman, neuyag pad si Arpaksad seled te 403 ne leg-un, wey nakaanak pad man-e sikandin te me lukes wey me malitan.

14 Te tatelu e ne pulu (30) ka idad ni Sila, nakaanak sikandin te lukes ne si Ibir. 15 Nataman, neuyag pad si Sila seled te 403 ne leg-un, wey nakaanak pad man-e sikandin te me lukes wey me malitan.

16 Te tatelu e ne pulu wey lalimma (35) ka idad ni Ibir, nakaanak sikandin te lukes ne si Pilig. 17 Nataman, neuyag pad si Ibir seled te 430 ne leg-un, wey nakaanak pad man-e sikandin te me lukes wey me malitan.

18 Te tatelu e ne pulu (30) ka idad ni Pilig, nakaanak sikandin te lukes ne si Riyu. 19 Nataman, neuyag pad si Pilig seled te 209 ne leg-un, wey nakaanak pad man-e sikandin te me lukes wey me malitan.

20 Te tatelu e ne pulu wey daruwa (32) ka idad ni Riyu, nakaanak sikandin te lukes ne si Sirug. 21 Nataman, neuyag pad si Riyu seled te 207 ne leg-un, wey nakaanak pad man-e sikandin te me lukes wey me malitan.

22 Te tatelu e ne pulu (30) ka idad ni Sirug, nakaanak sikandin te lukes ne si Nahur. 23 Nataman, neuyag pad si Sirug seled te daruwa ne gatus (200) ne leg-un, wey nakaanak pad man-e sikandin te me lukes wey me malitan.

24 Te daruwe e ne pulu wey siyam (29) ka idad ni Nahur, nakaanak sikandin te lukes ne si Tira. 25 Nataman, neuyag pad si Nahur seled te 119 ne leg-un, wey nakaanak pad man-e sikandin te me lukes wey me malitan.

26 Te pitu e ne pulu (70) ka idad ni Tira, nakaanak sikandin te tatelu ne lukes ne ensi Abram, si Nahur, wey si Haran.

Ka me kabuhalan ni Tira

27 Ne seini ka pangguhuren meyitenged te me kabuhalan ni Tira. Si Tira ka amey enni Abram, Nahur wey ni Haran. Si Haran ka amey ni Lut[gl], 28 wey diye migpatey si Haran te siyudad ne miglesutan din ne egngaranan te Ur ne sakup te me Kaldiya. Te pegpatey rin, neuyag pad mule ka amey rin ne si Tira. 29 Ne nakaasawe e si Abram ki Saray wey nakaasawe e si Nahur ki Milka ne anak ni Haran. Si Haran ka amey degma ni Iska. 30 Ne si Saray, ware mig-anak su kene egpakaanak sikandin.

31 Mig-awe si Tira diye te siyudad te Ur ne sakup te me Kaldiya wey induma rin ka anak din ne si Abram wey ka ambey rin ne si Saray, wey ka apu din ne si Lut[gl] ne anak ni Haran. Eggendiye perem sikandan te inged ne Kanaan,[gl] piru te pegginguma ran diye te siyudad te Haran, diyad e sikandan mig-ugpe. 32 Ne diye namatey si Tira te 205 ka idad din.

Ka peg-umew te Manama[gl] ki Abram

12[xr]Ne migkahi ka Magbebaye[gl] ne Manama[gl] diye te ki Abram, “Engkeri nu ka inged nu wey ka me karumaan nu wey ka pamilya te amey nu, ne hendiye ka te inged ne igpakita ku keykew. Egbehayan ku sikeykew te masalig ne me kabuhalan eyew egkeyimu sikandan ne dakel ne nasud. Egpanalanginan ku sikeykew wey egmabantug ka ngaran nu su eyew egkeyimu ka ne panalangin te langun. [xr]Egpanalanginan ku ka etew ne egbulig keykew, piru ka etew ne egdilus keykew, igdilus ku degma. Pinaahi keykew, egpanalanginan ku ka langun ne me nasud kayi te ampew te tane.”

Sikan naa, mig-awe e si Abram diye te Haran sumale te insuhu te Magbebaye[gl] ne Manama[gl] kandin wey migduma kandin si Lut[gl]. Te seeye ne timpu, pitu e ne pulu wey lalimma (75) ka idad ni Abram. Induma ni Abram si Saray ne asawa rin, wey si Lut[gl] ne anaken din, wey in-uyan din ka langun ne karatuan dan wey me uripen ne nakuwa ran diye te Haran. Ne migligkat e sikandan ka eggendiye te inged te Kanaan.[gl]

Te nekeuma ran diye te Kanaan,[gl]migleus pad man-e ensi Abram diye te matulus[gl] ne kayu ne diye te Muri, marani te inged te Sikim. (Diye pad nangugpe ka me matig-Kanaan te seeye ne timpu.) [xr]Ne nataman, migpakita ka Magbebaye[gl] ne Manama[gl] ki Abram ne migkahi, “Seini ne tane ka igbehey ku te me kabuhalan nu.” Ne diye miggimu si Abram te altar[gl] ne eg-unturan te egtutungen ne igbehey te Magbebaye[gl] ne Manama.[gl] Nataman, miggalin e man-e sikandan diye te bubungan ne diye dapit te igsile ligkat te Bitil. Ne diye sikandan migtagtaheed mig-ugpe te eletanan te inged ne Bitil wey Ay. Ka Bitil dapit te iglineb wey ka Ay dapit te igsile. Ne miggimu e man-e diye si Abram te altar[gl] te Magbebaye[gl] ne Manama[gl] wey diye sikandin mig-ampu. Ne migpabulus pad man-e ensi Abram ka eggalin-halin peendiye te inged ne Nigib.

Si Abram diye te Ihiptu[gl]

10 Te seeye ne timpu, due masumpit ne bitil diye te Kanaan.[gl] Sikan naa ka nakaleus pad man-e ensi Abram diye te Ihiptu[gl] eyew diye pad egtagtaheed eg-ugpe. 11 Te hapit e egpekeuma sikandin diye te inged te Ihiptu[gl], migkahiyan din ka asawa rin ne si Saray, “Nakanengneng a ne mateles ka amana ne malitan. 12 Ke egpakakita ka me matig-Ihiptu keykew, egkahi sikandan, ‘Asawa ni Abram seini.’ Ne eggimatayan ad nikandan, piru kene ka mule nikandan eggimatayan. 13 [xr]Sikan naa, kahii nu sikandan te talaari ki eyew kena a nikandan eggimatayan, wey eyew eg-ay-ayaran a nikandan te egsagsahipe tenged keykew.” 14 Te nekeume e si Abram diye te Ihiptu[gl], nakita iya te me matig-Ihiptu ne mateles amana ka asawa rin. 15 Te pegkakita kandin te me upisyal te Hari te Ihiptu[gl], ingkahiyan dan e ka Hari te mateles iya sikandin. Puun due, in-uyan e si Saray diye te palasyu te Hari te Ihiptu[gl]. 16 Tenged ki Saray, insagsahipe ay-ayari te Hari te Ihiptu[gl] si Abram wey impamehayan te me karniru,[gl] me kambing, me baka, me asnu,[gl] me kamilyu[gl], wey me uripen.

17 Piru tenged te impeuyan te Hari te Ihiptu[gl] si Saray ne asawa ni Abram, impeyingumaan te Magbebaye[gl] ne Manama[gl] te subla ne makaaldek-haldek ne dalu ka Hari wey ka me sakup din diye te palasyu. 18 Ne nataman, impeumew e te Hari te Ihiptu[gl] si Abram wey mig-insaan, “Nekey-a seini se innimu nu keddiey? Mania te wara a nikeykew kahii ne asawa nu bes sikandin? 19 Mania te migkahi ka ne talaari kew? Tenged due, impakuwa ku sikandin eyew eg-asaween ku. Na, seini red ka asawa nu, kua nu sikandin wey pangawe kew e!” 20 Migsuhu ka Hari te Ihiptu[gl] te me etew rin ne igparelrel e ensi Abram duma ka asawa rin wey ka langun ne kandin. Sikan naa, impanulud dan e sikandan diye te lihawangan te Ihiptu[gl].

Ka pegpasuwayey ni Abram ki Lut[gl]

13Sikan naa ka miglibed e man-e ensi Abram diye te inged te Nigib duma ka asawa rin wey si Lut[gl] wey ka langun ne kandin. Meyaman ne subla si Abram. Masalig e ka me karniru[gl] rin, me kambing, me baka, me seleppi, wey me bulawan. Puun te Nigib, miggalin-halin e man-e sikandan ka eg-ugpe taman te nekeuma sikandan diye te intagtaheeran dan dengan te eg-ugpe ne elat-elat te Bitil wey Ay. Seeye ka inged ne miggimuwan din dengan te altar.[gl] Diye man-e mig-ampu si Abram te Magbebaye[gl] ne Manama.[gl]

Ne si Lut[gl], ka migduma ki Abram, duen e degma pamilya rin wey me uripen din. Due degma me karniru[gl] rin, me kambing, wey me baka. Tenged te suble e ne masalig ka me ayam ni Abram ki Lut[gl], kenad e ne eleg te me ayam dan ka palayuranan ke egpekegdani sikandan ka eg-ugpe. Sikan naa ka migpeehetey ka me talagtameng te me ayam ni Abram wey ka me talagtameng te me ayam ni Lut[gl]. Kenad ne eleg ka palayuranan te me ayam dan su te seeye ne timpu diye pad degma nangugpe ka me matig-Kanaan wey me Pirisihanen.

Purisu, migkahiyan ni Abram si Lut[gl], “Kene ne meupiya ne egpeeg-ehetey ka me etew nu wey ka me etew ku tenged su anaken ku sikeykew. Meupiya pad ke egpasuwayey ki tenged su maluag pad seini se tane ne egkaayun ne eg-ugpaan. Na, alam ka te inged ne igkeupii nu te eg-ugpe, ke igkahibang naa wey ke igkakawanan. Ke eggendiye ka te igkakawan, eggendiya a degma te igkahibang.” 10 [xr]Sikan naa ka migpamantew si Lut[gl] wey nakita rin ne masalig ka me weyig diye te napu te Hurdan taman te Suar, ne nekeiling te pinamulaan te Idin wey nekeiling degma te inged ne Ihiptu[gl]. (Te seeye ne timpu, ware pad dereeti te Magbebaye[gl] ne Manama[gl] ka Suduma[gl] wey Gumura). 11 Purisu in-alam ni Lut[gl] ka langun ne napu te Hurdan wey miggipanew e sikandin ka egpeendiye te igsile. Iling due ne paahi ne nekegsuwey si Lut[gl] ki Abram. 12 Si Abram, diye mig-ugpe te inged te Kanaan[gl] wey si Lut[gl], diye mig-ugpe te marani te Suduma[gl] ne diye te me siyudad ne diye te napu. 13 Ne ka me etew ne nangugpe diye te Suduma[gl], amana ne maddeet wey makasesale[gl] diye te Magbebaye[gl] ne Manama.[gl]

Ka peggalin ni Abram diye te Hibrun

14 Te nakaligkat e si Lut[gl], migkahiyan te Magbebaye[gl] ne Manama[gl] si Abram, “Pamantawa nu ay-ayari ka langun ne inged. 15 [xr]Ka langun ne tane ne egkeumaan nu te egtengteng, igbehey kud keykew wey te me kabuhalan nu wey kaniyud e te ware egtamanan. 16 Egpamasalihen ku ka kabuhalan nu iling kasalig te alinepung kayi te ampew te tane ne kene egkaseel. 17 Ne hipanew kad, panleuya nu ka langun ne tane su igbehey ku keykew seini se langun.” 18 Nataman, miggalin e man-e si Abram ne diyad e mig-ugpe te marani te matulus[gl] ne me kayu ni Mamri diye te inged te Hibrun. Ne miggimu e man-e sikandin te altar[gl] ne eg-unturan te egtutungen ne igbehey diye te Magbebaye[gl] ne Manama.[gl]

Ka pegpangabang ni Abram ki Lut[gl]

14Te seeye ne timpu, due hep-at ne Hari ne migpakig-ehet te lalimma ne Hari. Seini ka hep-at ne Harisi Amrapil ka Hari ne diye te Sinar, si Aryuk ka Hari te Ilasar, si Kadurlahumur ka Hari te Ilam, wey si Tidal ka Hari te Guyim. Seini ka lalimma ne Hari ne migpakig-ehet kandansi Bara ne Hari te Suduma[gl], si Birsa ne Hari te Gumura, si Sinab ne Hari te Adma, si Simibir ne Hari te Sibuwim, wey ka Hari degma te Bila (wey ke Suar). Ne migsabeka te keseg dan ka lalimma ne Hari diye te Napu te Sidim (ne egngaranan e kuntee te Namatey ne Dahat). Su seled te sapulu wey daruwa (12) ne leg-un, nasakup pad sikandan ni Hari Kadurlahumur, piru nataman, te igkasapulu e wey tatelu (13) ne leg-un, migsukul e sikandan kandin.

Te seup ne leg-un, miggingume e ensi Kadurlahumur wey ka duma rin ne me Hari wey ka me sundalu ran eyew egpakig-ehet kandan. Piru te an-anayan, migpakig-ehet pad ensi Kadurlahumur te lein ne me tribu wey migpanalu sikandan. Seini ka lein ne me tribu ne natalu ranka Ripayhanen ne diye te Astarut Karnaim, ka me Susihanen ne diye te Ham, ka me Imihanen ne diye te napu te Kiriataim, wey ka me Hurihanen ne diye te me bubungan te Siir. Ne diyad e nataman ensi Kadurlahumur ka migpanlupug kandan te Ilparan ne diye te ilis te napu te mammara ne inged ne kene egkeugpaan. Nataman, miglibed e ka hep-at ne Hari wey nekeendiyad te inged ne Kadis ne egngaranan dengan te Inmispat. Naahew ran ka langun ne inged te me Amalikanhun wey natalu ran ka me Amurihanen ne diye mig-ugpe te Hasasun Tamar.

Ne impalibulung te me Hari te Suduma[gl], Gumura, Adma, Sibuwim, wey Bila ka me sundalu ran diye te Napu te Sidim. Ne migpakig-ehet e sikandan ki Kadurlahumur ne Hari te Ilam wey te duma rin ne me Hari te Guyim, Sinar, wey Ilasar. Lalimma ne Hari ka migpakig-ehet te hep-at ne Hari. 10 Ne diye te Napu te Sidim, due sesalihi ne me bitu ne napenu te ispaltu. Te egpamallahuy e ka me Hari te Suduma[gl] wey Gumura wey ka me sundalu ran, due neneulug te me bitu wey due duma ne nakapallahuy diye te me bubungan. 11 Ne impanguwa te hep-at ne Hari ka langun ne diye te siyudad te Suduma[gl] wey Gumura, minsan ka langun ne egkakeen, wey nangipanew e sikandan. 12 Ne in-uyan dan degma ka anaken ni Abram ne si Lut[gl] ne diye mig-ugpe te Suduma[gl], wey impanguyan dan ka langun ne karatuan din.

13 Ne due nakapallahuy ne migpanugtul ki Abram ne Hibruwanen ne si Lut[gl], indakep. Te seeye ne timpu, diye mig-ugpe si Abram te marani te matulus[gl] ne me kayu ni Mamri ne Amurihanen ne suled ni Iskul wey Anir. Sikandan ki Abram ka egpepangpangabangey. 14 Te pegkarineg ni Abram ne indakep ka anaken din, inlibulung din e ka 138 ne talagbubunu din wey inlupug dan e ka hep-at ne Hari taman diye te inged ne Dan. 15 Te pegkamarusilem, imbaad-baad e ni Abram ka me etew rin wey inlusuran dan e ka me kuntere dan wey natalu ran sikandan. Ne inlupug e enni Abram ka nakapallahuy taman diye te Huba ne diye te igkahibang ne balabahan dapit te igsile te Damasku. 16 Ne nataman, naawi dan ded ka langun ne karatuan ne naahew te me kuntere wey naawi dan ded degma si Lut[gl] wey ka me karatuan din lagkes ka me malitan wey ka langun ne etew ne nenaddakep.

Ka pegpanalangin ni Milkisidik ki Abram

17 Te peg-uli ni Abram puun te pegpanatalu rin engki Kadurlahumur wey te duma rin ne me Hari, insinug-ung e sikandin te Hari te Suduma[gl] diye te Napu te Sabi. (Ne egngaranan degma te Napu te Hari.) 18 [xr]Insinug-ung degma sikandin ni Milkisidik ne Hari te Salim wey talagpanubad degma te Amana ne Mabantug ne Manama.[gl] Mig-uyanan din te paan wey binu si Abram. 19 Ne impanalanginan din si Abram te migkahi,

Egpanalanginan si Abram te Amana ne Mabantug ne Manama[gl] ne iyan miggimu te langit wey tane.

20 Egdayanen ka Amana ne Mabantug ne Manama[gl] ne migbehey keykew te kapanaluwan diye te kuntere nu!”

Ne imbehayan ni Abram si Milkisidik te igkasapulu ne baad te langun ne naawi din.

21 Ne migkahiyan te Hari te Suduma[gl] si Abram, “Keykew e ka langun ne me karatuan ne naawi nu. Piru iuli nu re kayi te keddi ka langun ne etew ku.”

22 Piru migtabak si Abram, “Migsaad a diye te Magbebaye[gl] ne Manama,[gl] ka Amana ne Mabantug ne Manama[gl] ne iyan miggimu te langit wey tane, 23 ne kena a egkuwa te minsan nekey ne keykew, minsan bula-bula wey ke hiket naa te sandalyas. Su eyew kene ka egpakakahi ne naratu a tenged keykew. 24 Ware minsan nekey ne egkuen ku gawas te nakeen e te me etew ku. Piru pakua nu te me baad dan ka me duma ku ne ensi Anir, si Iskul, wey si Mamri.”

Ka saad te Manama[gl] diye te ki Abram

15Te ware naluhey, hendue te impataheinep si Abram te Magbebaye[gl] ne Manama[gl] wey migkahiyan,

Kene ka kaaldek Abram.

Sikeddi ka kalasag nu

wey dakel ka ig-unag ku keykew.”

Piru mig-inse si Abram, “Magbebaye[gl] ne Manama,[gl] egmenuwen ku naa ka ig-unag nu keddi te ware pad anak ku? Iyan e egpakakamuney te karatuan ku ke egpatey a si Iliisir ne matig-Damasku. Na, tenged te ware e ma behayi nikeykew te anak, seini se uripen ku ne miglesut kayi te baley ku ka egpakakamuney te karatuan ku.”

Ne migkahiyan e man-e sikandin te Magbebaye[gl] ne Manama,[gl]Kene ne iyan egpakakamuney te karatuan nu ka uripen nu, ke kene, ka anak nu iya.” [xr]Ne in-uyan sikandin te Magbebaye[gl] ne Manama[gl] diye te lihawangan wey migkahiyan, “Leng-ag ka diye te langit wey seela nu ka me bituen ke egpakaseel ke naa. Iling naa degma due kasulug ka me kabuhalan nu.”

[xr]Migpalintutuu si Abram te Magbebaye[gl] ne Manama,[gl] ne puun due, in-isip din ne matareng si Abram.

Ne migkahiyan sikandin te Magbebaye[gl] ne Manama,[gl]Sikeddi ka Magbebaye[gl] ne mig-uyan keykew ligkat te inged ne Ur ne sakup te me Kaldiya, eyew igbehey ku keykew ka seini ne tane.”

Piru mig-inse si Abram, “Magbebaye[gl] ne Manama,[gl] egmenuwen ku naa te pegnengneng ne egkakeddiey e seini keureme?”

Ne migtabak ka Magbebaye[gl] ne Manama,[gl]Uyani a te baka, wey kambing, wey karniru[gl] ne lukes, ne elin tigtatelu ne leg-un ka idad dan, wey uyan ka man-e te tukmu wey seleppati.” 10 Ne impanguyan seeye langun ni Abram diye te Manama,[gl] wey innimatayan din ka tagse sabeka ne ayam wey impanuley rin seeye gawas te tukmu wey seleppati. Ne immeg-andang din ka tagse suley. 11 Ne due me manuk-manuk ne miglene diye te impameri rin ne me ayam eyew egkeen perem dutu, piru in-alew seeye ni Abram.

12 [xr]Te hapit e eglineb ka aldew, nakalipereng wey naalineknek si Abram, ne due makaaldek-haldek ne migginguma kandin.[fn] 13 [xr]Ne migkahiyan sikandin te Magbebaye[gl] ne Manama,[gl]Eggalin ka me kabuhalan nu diye te inged ne kene ne kandan. Diye egkeuripen sikandan wey egde-deehen seled te hep-at ne gatus (400) ne leg-un. 14 [xr]Piru eglegparan ku ka nasud ne mig-uripen te me kabuhalan nu. Nataman, egpakaawe sikandan te seeye ne inged wey egpekeuyan sikandan te dakel ne karatuan. 15 Ne meyitenged mule keykew, egkabuyag ke pad, wey egpatey ka keureme ne meupiya ka peglebeng keykew. 16 Ne ka me kabuhalan nu, wey e egpakalibed sikandan kayi ke egkatuman ka hep-at ne gatus (400) ne leg-un. Kene ku pad egdeldelen tenged te sale dan ka me Amurihanen ne mig-ugpe kayi su kene pad eleg ne timpu ne eglegparan sikandan.”

17 Te miglineb e ka aldew wey te migmarusilem e, sahuhune ne due miglepew ne kuren ne mig-eebel wey sulu ne nalegleg. Ne diye seeye migbaye te elat te impanuley rin ne me ayam. 18 [xr]Te seeye ne timpu, migsaad ka Magbebaye[gl] ne Manama[gl] diye ki Abram ne migkahi, “Igbehey ku diye te me kabuhalan nu seini se tane ligkat te weyig ne diye te Ihiptu[gl] taman te dakel ne Weyig ne Iyupratis. 19 Seini ka inged ne mig-ugpaan te me Kinihanen, me Kinisihanen, me Kadmunihanen, 20 me Hitihanen, me Pirisihanen, me Ripayhanen,